Breaking

உலகில் மாறாமல் இருப்பது எது.


 "அன்பு" மட்டுமே உலகில் மாறாமல் இருகின்றது. அன்பில் கிடைக்கும் சக்திக்கு நிகரான மருந்து இன்னும் கண்டுபிடிக்கப் படவில்லை . 

அன்பு என்ற அந்த அற்புத மருந்து தான் இந்த உலகை வாழ வைத்துக் கொண்டிருக்கிறது . அந்த அன்பின் அளவு என்று குறைகிறதோ அன்று இந்த உலகம் அழிந்து விடும்.

உண்மையான அன்பை மற்றவர்களுக்குக் கொடுத்தால் அதைவிட அதிகமான அன்பை ஓர் நாள் அவர்களிடம் இருந்து அதிகமாகப் பெறுவோம்...

அன்புக்கு கட்டுப்படாதவர்கள் இந்த உலகத்தில் யார் இருக்கிறார்கள்...?

''அன்பு தான்'' அனைத்து உயிரினங்களுக்கும் மகிழ்ச்சியை அளிக்கக் கூடியது.

அன்பு என்பது தானாக வருவது, அதை எவரும் விலைக்கு வாங்க முடியாது, அன்பு இனிமையானது, நிலையானது...!

இந்த உலகில் நிலையானது பணமோ பொருளோ அல்ல... அன்பு மட்டுமே...!

மன்னர் ஒருவருக்கு ஒரு அய்யம் எழுந்தது, உலகில் அனைவருக்கும் மகிழ்ச்சியை வழங்கக் கூடிய பொருள் எது...? என்பதே அவர் கேள்வி.

“மன்னரின் கேள்விக்கான சரியான விளக்கத்தை அறிஞர்கள் மட்டுமல்லாமல் மக்களும் அளிக்கலாம். அனைவரையும் மகிழ்விக்கும் பொருளை அரண்மனையில் இருக்கும் கொலு மண்டபத்தில் வைத்து விடுங்கள்.

யாருடைய பொருள் அரசருடைய அய்யத்திற்கு சரியான விடையை வழங்குகிறதோ, அவருக்கு ஆயிரம் பொற்காசுகள் பரிசு வழங்கப்படும் என அறிவிக்கப்பட்டது.

மக்களும் ஆலோசித்து, அவர்களுக்குத் தெரிந்து மகிழ்ச்சி தரும் பொருட்கள் எவையோ, அவற்றைக் கொண்டு வந்து அரண்மனை கொலு மண்டபத்தில் வைத்து விட்டு, ஆயிரம் பொற்காசுகள் பரிசிற்காகக் காத்திருந்தார்கள்.

மறுநாள், மன்னர் கொலு மண்டபத்திற்கு வந்து தனது அய்யப்பாட்டினைத் தீர்க்கும் பொருள் என்னவாக இருக்கும் என்ற ஆவலோடு பார்வையிட்டார். மக்கள் வைத்த பொருட்கள் மண்டபத்தில் நிரம்பியிருந்தது. ஒவ்வொரு பொருட்களாக அரசர் கண்டு கொண்டே வந்தார்...

முதலில், சிறிய அளவு பொன் இருந்தது. அதன் கீழே, “செல்வமே மகிழ்ச்சி தரக்கூடியது” என எழுதப்பட்டு இருந்தது...

ஆனால், “செல்வந்தர்களுக்கும், நோயாளிகளுக்கும் செல்வம் எப்படி மகிழ்ச்சியை கொடுக்கும்...?” அதனால் இது சரியான விளக்கம் அல்ல.” என அதனை மறுத்து விட்டார் மன்னர்.

அடுத்ததாக, இசைக் கருவி இருந்தது. அதன் கீழே, “இசையே மகிழ்ச்சி தரக்கூடியது” என எழுதப்பட்டு இருந்தது.

ஆனால், “காது கேட்காதவர்களுக்கு இந்த இசை எப்படி மகிழ வைக்கும்...? இதையும் ஏற்றுக் கொள்ள முடியாது.” எனக் கூறி புறக்கணித்தார்.

அடுத்து, அழகான மலர்கள் இருந்தன. “இவை, கண் தெரியாதவர்களுக்கு எப்படி மகிழ்ச்சியைக் கொடுக்க முடியும்...? அதனால் இதையும் ஏற்றுக் கொள்ள முடியாது” என அதனையும் புறக்கணித்து விட்டார்.

அடுத்து, இனிப்பான பலகாரங்கள் இருந்தது. “நோயாளிகளுக்கு எப்படி இனிப்பு மகிழ்ச்சியைத் தரும்...?” என்று கூறி அதனையும் புறக்கணித்தார் மன்னர்...

அடுத்தாக ஒரு பெரிய சிற்பம் இருந்தது., அருகில் வந்தார். அதன் கீழே ஒரு சிற்பம். அதில் ஒரு தாய், பசியில் இருக்கும் ஒரு சிறுவனுக்கு உணவு தருவது போல அந்தச் சிற்பம் வடிவமைக்கப்பட்டிருந்தது...

அந்த சிற்பத்தின் கீழே.,
“அன்பே உலகை ஆளும்” என்று எழுதப்பட்டிருந்தது.

இந்தச் சிலையை வைத்த சிற்பியை அழைத்து வாருங்கள் என்றார் மன்னர். வறுமை தின்ற உடலுடன் ஒரு ஏழை சிற்பி, மன்னரின் முன் அழைத்து வரப்பட்டார்...

“நீங்கள் தான் இந்த சிலையை இங்கு வைத்தீரா...? இதன் பொருள் என்ன என்பதை விளக்கமாகக் கூறுங்கள்.” என்றார் மன்னர் அந்த சிற்பியிடம்...

“அரசே . சிற்பத்தின் கீழே ஒரு பெண்மணி அன்போடு ஒரு சிறுவனுக்கு உணவு வழங்குகிறாள். இந்த உலகில் அன்பை மட்டும் தான், பார்வையற்றவர்களும், காது கேளாதவர்களும், வாய் பேச இயலாதவர்களும் உணர முடியும்...

அதேபோல் உடல்நலம் இல்லாதவர்களும், அன்பை மட்டும் தான் எதிர்பார்க்கிறார்கள்.

அன்பு மட்டுமே உலகில் சிறந்தது. அன்பிருந்தால் எதிரியையும் நண்பனாக்கும். அன்பு இல்லையெனில் நண்பனையும் எதிரியாக்கும்.

உலகில் சிறந்ததும், அனைத்து உயிரினங்களுக்கும் மகிழ்ச்சியை வழங்கக் கூடியதும் அன்பு மட்டும் தான் என விளக்கினார் சிற்பி.

இதை செவிமடுத்த அரசர் மிகவும் மகிழ்ந்தார். உலகிலேயே அனைவருக்கும் மகிழ்ச்சி அளிக்கக் கூடியது எது என்ற என் அய்யப்பாட்டிற்கு அருமையான விளக்கம் என்று கூறினார்.

ஆயிரம் பொன்னையும் சிற்பிக்கு பரிசாக வழங்கி, அரசவையில் வேலையையும் கொடுத்து ஏழை சிற்பியின் வாழ்க்கைத் தரத்தை உயர்த்தினார் அரசர்...

ஆம் நண்பர்களே...!

அன்பு ஒன்று மட்டுமே உலகை வாழ வைக்கும்...!

அன்பு தான் நம்மை மகிழ்வுறச் செய்யும்...!!
இவ்வுலகத்தில் நிலையானது அன்பு மட்டுமே...!!!

அன்பு செலுத்துவோம்,  அன்பைப் பெறுவோம்...!

மனிதனை மனிதனாய் மதிப்போம்...!  மனிதத்துடன் உயர்வோம்.

No comments:

Powered by Blogger.